Rhestr Artistiaid - Manylion

Daeth y Trawsfynydd Lo-Fi Liberation Front i amlygrwydd ar ddechrau’r mileniwm drwy donfeddi yr orsaf radio Gymraeg gyntaf ar y we, Radio D. Rhyddhawyd eu albwm cyntaf, Croeso i’r Canolfan Ymwelwyr ar label Fitamin Un yn 2000 gan ddrysu gwrandawyr gyda synau diwydiannol, ethos anghydffurfiol arbrofol a meddylfryd electroneg DIY. Ymddangosodd y TLLF ar gasgliadau labeli Burning Emptiness Inc yn Ffrainc a Ochre yn Lloegr.

Yn 2001, wedi perfformio yn y Centre de Cultura Contemporania de Barçelona, dychwelasant i Gymru i sefydlu’r Labordy Swn Cont... sef casgliad o gerflunwyr sain blaengar ac arbrofol. Fel rhan o’r Labordy cafwyd perfformiadau yng Nghanolfan Chapter, Caerdydd a rhyddhawyd record 12”. Ni chlywyd llawer ganddynt wedi hynny...nes nawr.

Trac electroneg a recordiwyd ar y cyd rhwng y Trawsfynydd Lo-Fi Liberation Front a Stabmaster Vinyl ydi “(Mab Annwyl) Dy Fam”. Serch hynny dydi’r ddau artist tanddaearol yma erioed wedi cwrdd. Recordiwyd y gân yma wrth i’r ddau anfon synau yn ôl ac ymlaen at ei gilydd dros y we. Chwaraewyd y trac eisoes ar One Music ar Radio Un, sioe Huw Stephens ar C2 Radio Cymru ac ar yr orsaf ryngrwyd, Radio Amgen.

Mae “(Mab Annwyl) Dy Fam” yn ymddangos ar y casgliad amlgyfrannog SWN ESMWYTH, LLYFN, MOETHUS RECORDIAU SAFON UCHEL sydd allan nawr ar label Recordiau Safon Uchel.