Newyddion - Manylion

Y mis nesaf ceir diwrnod agored arbennig i'r diwydiant cerddoriaeth Gymraeg i drafod materion sy'n ymwneud a'r defnydd o gerddoriaeth yn y byd darlledu. Bydd y digwyddiad, sydd yn cael ei gydlynnu gan Welsh Music Foundation (WMF) mewn cydweithrediad gyda S4C a'r BBC, yn cynnwys cynrychiolaeth o'r prif orsafoedd radio cenedlaethol, adrannau perthnasol o fewn y BBC & S4C, yn ogystal ag unigolion o gwmniau cynyhyrchu teledu a ffilm. Dros bedwar sesiwn gwahanol bydd y pynciau canlynol yn cael ei trafod; canllawiau 'plugging', cerddoriaeth cyfoes mewn teledu a ffilm, y defnydd pellach o gerddoriaeth - hawliau & hawlfraint, cerddoriaeth cefndir & marchnata.

Dywedodd Guto Brychan, Swyddog Gymraeg WMF, " Mae'n bwysig iawn i'r diwydiant cerddoriaeth Gymraeg fod yn ymwybodol o'r ffyrdd mae darlledwyr yn gweithredu. Trwy esbonio'r broses mewn digwyddiad fel hon rydym yn gobeithio codi'r ymwybyddiaeth o'r gwahanol elfennau sydd yn dylanwadu'r defnydd a ddewis o gerddoriaeth mewn unrhyw gynhyrchiad neu rhaglen radio. Mae creu canllawiau 'plugging' yn engraifft berffaith o hyn - trwy lunio pwyntiau penodol ar gyfer y labeli Cymraeg mae'n bosib rhoi system mewn lle sy'n glir i bawb.

Rhaid nodi hefyd mae dyma'r tro cyntaf i'r diwydiant cerddoriaeth a darlledu i ddod ynghyd mewn digwyddiad fel hon, ac o ganlyniad mi fydd yn gyfle gwych i greu a datblygu cysylltiadau newydd gyda eraill yn y maes."

Mae'r diwrnod agored yn cael ei gynnal ym mhencadlys S4C yng Nghaerdydd ar ddydd Gwener 6ed o Fai, 2005.

Mae'r digwyddiad yn agored i gynhyrchwyr cerddoriaeth Cymraeg sydd eisiau cael ei cerddoriaeth wedi ei chwarae ar y teledu a radio yng Nghymru, yn ogystal a phobl sy'n cynhyrchu i radio a theledu.

Mi fydd y sesiwn yn cael ei gynnal trwy gyfrwng y Gymraeg, ond mi fydd offer cyfieithu ar gael. A fedrwch chi gysylltu gyda ni o flaen llaw os oes angen offer cyfieithu arnoch.

Os oes ganddo chi ddiddordeb mynychu'r digwyddiad, cysylltwch gyda Guto Brychan, naill ai trwy ebost - guto@welshmusicfoundation.com - neu trwy ffonio swyddfa WMF; (029) 20668127.