Newyddion - Manylion
Ffocws Gymraeg ar y diwydiant Cerddoriaeth
Dydd Gwener, 22 Gorffennaf 2005 - 11:00am | Diwydiant |
Yn ystod wythnos yr Eisteddfod mi fydd Welsh Music Foundation (WMF) yn cynnal dwy seminar trwy gyfrwng y Gymraeg i drafod y diwydiant cerddoriaeth yng Nghymru. Mae'r seminarau yn digwydd yn ystod wythnos yr Eisteddfod Genedlaethol, sydd wedi ei leoli ar Ystad y Faenol gerllaw.
- Hyrwyddo digwyddiadau byw yn yr iaith Gymraeg - Mawrth 2il Awst, 12pm
- Rhedeg label recordiau fel SME – Mercher 3ydd Awst, 12pm
Cynhelir seminar ynghylch hyrwyddo digwyddiadau byw trwy gyfrwng y Gymraeg ar ddydd Mawrth 2il o Awst. Bydd y seminar yn cael ei arwain gan Guto Brychan, cyn reolwr adloniant Clwb Ifor Bach yng Nghaerdydd, ac yn gyfrifol am gydlynu Maes B yn yr Eisteddfod Genedlaethol. Mae'r siaradwyr eraill yn cynnwys yr hyrwyddwr cerddoriaeth Rhys Mwyn, Einion Dafydd o Cyngor Celfyddydau Cymru, yn ogystal â gorolwg o’r gyfraith trwyddedu newydd a'i effaith ar hyrwyddo cerddoriaeth byw gan swyddog trwyddedu o Ogledd Cymru. Pwrpas y digwyddiad yw edrych ar holl agweddau o drefnu gig - o drafod gyda'r artistiaid i redeg y sioe. Bydd y testunau trafod yn cynnwys marchnata, cynllunio ariannol, cytundebau a materion technegol.
Ar y diwrnod canlynol, Dydd Mercher 3ydd o Awst, rhedeg label recordiau fel BBaCh (busnesau bach a chanolig) sydd dan sylw. Cyn reolwr label recordiau a phrif weithredwr WMF Elliot Reuben fydd yn arwain y drafodaeth, ac mi fydd y materion canlynol yn cael sylw yn ystod y prynhawn; cyhoeddi, llif arian a chytundebau cydamseru, marchnata a rheoli prosiectau. Hefyd yn cyfrannu i'r drafodaeth bydd Huw Williams, sylfaenydd Townhill Publishing, ac mi fydd cynrychiolydd o label recordiau cydnabyddedig yn trafod ei brofiadau yn y diwydiant cerddoriaeth.
Bydd y seminarau yn cael ei gynnal yn y Galeri, Doc Fictoria, Caernarfon - canolfan mentrau creadigol yng Nghaernarfon, ac yn dechrau am 12pm. Bydd y seminarau yn cael ei gynnal trwy gyfrwng y Gymraeg. Bydd offer cyfieithu ar gael ar y prynhawn dydd Mercher yn unig. Mae mynediad am ddim, ac yn agored i unrhyw un sydd yn ymwneud a hyrwyddo digwyddiadau byw yn y sin gerddoriaeth Gymraeg.
Os oes diddordeb ganddo'ch i fynychu un o'r digwyddiadau, neu angen mwy o wybodaeth yna cysylltwch gyda Guto Brychan yn swyddfa Welsh Music Foundation yng Nghaerdydd: (029) 20668127 / guto@welshmusicfoundation.com
Cyfrannwr: Guto Brychan
Diweddarwyd: 21 Hydref 2006, 7:16pm