Newyddion - Manylion

Mae un o gyn-drigolion pentref Pontrhydfendigaid, Tecwyn Ifan, wedi mynegi ei gyffro ynglŷn â dychwelyd i'r pentref i berfformio fel un o brif artistiaid Gig Mawr Bont eleni.

Mae Tecwyn yn un o gerddorion mwyaf hoffus Cymru ac wedi profi gyrfa ryfeddol sydd wedi goroesi 4 degawd a channoedd o berfformiadau byw. Treuliodd nifer o flynyddoedd yn byw a gweithio ym Mhontrhydfendigaid yn ystod y 1980au, a bydd yn dychwelyd i'w gartref ysbrydol fel un o brif atyniadau gŵyl ddiweddaraf y calendr cerddorol ar Sadwrn 30ain Mehefin.

Cynhelir y digwyddiad ym Mhafiliwn newydd y pentref, a adnewyddwyd yn ddiweddar gyda chymorth arian Amcan 1 Ewropeaidd, ond bydd Tecwyn Ifan yn fwy cyfarwydd â'r hen ganolfan a oedd yn ei hanterth yn ystod ei gyfnod yn yr ardal. Dywedodd Tecwyn, "mae gennyf atgofion melys o’r Pafiliwn fel un o ganolfannau cerddoriaeth pwysicaf Cymru. Ymwelodd pob math o artistiaid â’r ganolfan dros y blynyddoedd, o Max Boyce i Jools Holland, gan ddenu 3000-4000 o bobl yn gyson i'r pentref bach."

"Rwy hyd yn oed yn cofio helpu trefnu ambell ddigwyddiad cerddorol Cymraeg fy hun yno, ac yn cofio rhai gigs bythgofiadwy – Byd Bont a drefnwyd gan Sulwyn Tomos i godi arian i leddfu peth ar newyn a thlodi yn Affrica (ar ffurf 'Live Aid), ac yn bellach yn ôl na hynny rwy’n cofio canu yn rhai o'r Pinaclau Pop yno yn y 60au. Rwy’n falch iawn bod yr hen bafiliwn wedi cael ail wynt yn ddiweddar yma, a gobeithio y caiff ddyfodol prysur a llwyddiannus."

Mae digwyddiad eleni'n addo cystadlu â rhai’r gorffennol gydag arlwy a fydd yn cyffroi cynulleidfaoedd. Cefnogir y prif berfformiwr, Bryn Fôn, gan artistiaid poblogaidd fel Bob Delyn a’r Ebillion, Fflur Dafydd ac wrth gwrs Tecwyn Ifan, a ddywedodd "fe wnes i ysgrifennu nifer o ganeuon am fy nghyfnod yng Ngheredigion ac mae rhai ohonynt ymysg y mwyaf poblogaidd yn fy set - mae’n siŵr y bydde’n well i mi ganu rhai o’r rhain ar y noson neu byddai’n hen gyfeillion byth yn maddau i mi!".

Cynhelir Gig Mawr Bont ym Mhafiliwn Bont, Pontrhydfendigaid ar 29-30ain Mehefin - dyma fanylion y gigs

Gallwch brynu tocynnau yn awr ac am fwy o wybodaeth gallwch ymweld â'r wefan.